تبلیغات
Haraylarım
چهارشنبه سی و یکم خرداد 1396

یانماق!

   نوشته شده توسط: haray    

گاهدان بیر عؤمور آلیر اینساندان،

بیر سؤزجویون آنلامینی قانماق!

گون لر،آی لار، ایل لر اؤتوب گئچدی،

من ایندی قانیرام، نه دیر یانماق!؟

یانیرام...!

اؤتن گون لره، ایل لره،

اورکده قالان نیسگیل لره...

یانیرام...

یاندیقجا، ایچیمده کی اود سؤنر سانیرام،

سؤنر ساندیقجا، روحوما آلوو ساچیرام...

روحوم یانیر، اؤزوم یانیرام...

یانماق نه دیر، نئجه دیر،

ایندی یامان قانیرام...!


چهارشنبه سی و یکم خرداد 1396

آیریلیق شعرلری...

   نوشته شده توسط: haray    

گاهدان گئدنین یئری تئز دولار دئییرلر
...
سن گئتدین
و
شاعیرلیگیم توتدو یئرینی،
سنه آیریلیق شئعرلری یازاییم دئیه.


چهارشنبه سی و یکم خرداد 1396

یوخوسوز خاطیره لر...

   نوشته شده توسط: haray    

گئتمک ایسته دین و گئتدین،

بهانه لی یا بهانه سیز...!

آما بیلکی،

اویاتدیغین خاطیره لرین

یوخوسو بتر قاچیب!


سه شنبه پنجم مرداد 1395

یاساق اؤپوش!

   نوشته شده توسط: haray    

اؤزومه سؤز وئرمیشدیم

یالنیزجا گئجه‌لر،

قارانلیقدا سئویشه‌جکدیم سن‌ایله ...

اویسا بو کز،

قانماز بیر آخشام چاغینا راست گلدی بو اؤپوش!

و آچیق پنجره‌مدن

شاهید اولدو بو گوناها،

حیطده‌کی آلما آغاجی...

و سن تله‌سیب، قاچارکن،

یاناغیمدان ییخیلیب، دوداغیمدا جان وئردین!...


دوشنبه دهم شهریور 1393

"سن" آغریسی

   نوشته شده توسط: haray    


اوره ییمین بیر گیزلین بوجاغیندان


سیزیلتی سسی قالخیر یئنه،


یئنه ده ایچیمده "سـن" آغریییرسان!


درمانسیز دردیم،


علاج سیز آغریم،


سن آغرییاندا دلینیر باغریم،


"سنی" آه می، چکیم؟!


یوخسا، باغیریم؟!


هئچ بیر هئجایا سیغیشماییرسان!...

 


پنجشنبه سی و یکم مرداد 1392

4 ایل (بیلیم یوردو-کارشناسی دؤورانی)!

   نوشته شده توسط: haray    

گئچیر زامان، یاخشی و پیس
ایز بوراخیر کؤنول لرده
 زامان زامان خاطیره لر
گولومسه دین،قاه-قاه گولدون،
قهرسیندین،گاهدان دا بیر
یاواش - یاواش
سس سیز - سس سیز
سن آغلادین!
گؤز یاشلارین آخیب گئتدی،
دوداقلاردا او گولوش لر
قالماز اولدو،
آن کئچدیکجه سولوب گئتدی.
نه قالدی، باخ!
گؤرورسن می؟!
جان دوستلارین،یولداش لارین
اوغرونا جان وئردیکلرین،
اؤنونده باش ایدیکلرین
ایندی یوخلار!
ایسته سنده داها گلمز،
گلر اولسا قالا بیلمز،
آخی زامان، یامان کئچیر!
عقربه لر تیک - تاک ائدیر،
سس ائله مه،
قولاق وئرسن بیر سس گلیر،
ائشیدیرسن؟!
اوره یینی چیرپیندیریر،
گؤزلرینی یاواش - یاواش سولاندیریر،
صفحه - صفحه ورق آچیر،
بیر آی اول،
بیر ایل اؤنجه،
4 ایل قاباق!
ایچینده بیر سس باغیریر،
گؤزوندن بیر یاشدیر آخان،
گئتمه دایان، نولار زامان!
آما داها قالا بیلمز،
آشیر بیر- بیر او صفحه لر
گئدیر، گلیر
بیر باخیرسان
اوزونده بیر گولومسه مه
گؤزلرینده بیر دامجی یاش،
کئچیب زامان یاواش - یاواش!
اولوب یئنه 4 ایل سونرا...


یکشنبه پانزدهم اردیبهشت 1392

...

   نوشته شده توسط: haray    

ائله سولایاردی باغچامیزین آغاج لارین،

بیلمه سه یدین،

بار وئرر آغاج، قیشدا ساناردین!

بئله ایش لری چوخ اولاردی آنامین...

گاهدان دا گونشه نذر دئیه ردی،

گئجه لر دوغماسی اوچون!...


چهارشنبه بیست و دوم آذر 1391

سئوگیلی تبریز!

   نوشته شده توسط: haray    

نه تانیش قوخون وار سئوگیلی!
تورپاق قوخور تنین...
گؤزلرین گؤی مچید
نامازلاریمی سنده قیلاسیم گلیر،
قُربَةً الی سَن!
سجاده م قارا گیلن...
***
نه تانیش سسین وار سئوگیلی!
گوللـه سسلنـدیریر اورک دؤیونتون،
یورغون سینه سیدیر ارکـیمین سانکی،
من باغریندا دینجه لیم ایسته ییرم...
قوی پوزسون اوروجـومو
دوداغـیمدان آخان قـان،
یارالارینی تامسینـاسیم گلیر!
***
نه تانیش هاوان وار سئوگیلی!
گؤزون یاندیریر،
سؤزون اوشودور!
پاییز گونشی دیر سانکی،
ائل گؤلومده شاخیر!
من دونارکن آلیشـاسیم گلیر!
***
نه تانیش آدین وار سئوگیلی!
سوسارکن هایقیریر دوداقلار سنی!
شعرلر یئتمه ییر وصفینه سنین!
آدینی کؤنلومه یازاسیم گلیر!
***
سن نه تانیـشسان منه سئوگیلی!
"تـبـریـز" می دیر سنین آدین؟!
...



دوشنبه بیست و نهم آبان 1391

قادین

   نوشته شده توسط: haray    

بیر "اوف" دئییب،
اولدو، قادین!...
قادینلیغین اوفولتوسو
نه گونلره، نه ایل لره سیغماز اولدو!
سسله دیلر اونون آدین
سحر- آخشام اوفولدایان یازیق قادین!
دینمه دی او...
بو حیاتدا بیر گون اولسون
آغلامادی،سیزلامادی!
دردلرینین اینیلتیسی گؤیه قالخدی،
آمما اؤزو دینمز اولدو!
ییغیب بوتون دردلرینی،
دئییلمه میش،سوسقون قالان
سؤزلرینی،
بیر سؤزجوکده سؤیله دی او...
بیر گئجه نی صوبحه یاخین،
بیر "اوف" دئییب، 
اؤلدو قادین!...


یکشنبه بیست و یکم آبان 1391

خزلین سسی!

   نوشته شده توسط: haray    

خزلین سسی!
بیر زامان ان سئودیگیم سس!...ایندی آما، اینجیدیر منی!
من یئریدیکجه، چیغیریر سانکی،
آیاقیم آلتدا قالمیش او سینیق یاپراق!
دینمه نه اولار،سسینی بیر کس!
قولاقیم قاشینیر قیریق سسیندن!...
یامان قاشینیر!...
قوناق می گله جک بیریسی یوخسا؟!!
منی قوتاراجاق می بو سینیق سسدن؟
دئیه دوشوندوم...
آنسیزین قارغا!
او قوناق اولسا گرک!
دیبیمدن کئچدی،سالامسیز، سؤزسوز!
آرخامدا آغاجا اوتوروب،باخدی!
سوسموش ساندیغیمدا،
دانیشدی قارغا...
"برف،برف،برف"!!!
او کیتابدا اوخودوغوم تک...
اوشودوم بیردن!
و من قار آرزولاییب، خزلی سئودیم!...


چهارشنبه سوم آبان 1391

...

   نوشته شده توسط: haray    

دیلیم شیشسین!...
بیر داها اوره گیمه چاغیرسام سنی!...

Dilim Şişsin!...
 Bir Daha Ürəyimə Çağırsam SƏNi!


یکشنبه نوزدهم شهریور 1391

یاستیق

   نوشته شده توسط: haray    

 
یورولموشدوم!
دایانماغا بیر اوموز،
دینلمه یه بیر اورک...
بوایدی ایسته ییمین اولماز نوقطاسی!
...
بونلارین هامیسی واریکن سنده،
...
بیر یاستیق وئردین سن دینجه لیم دئیه!...


سه شنبه چهاردهم شهریور 1391

...

   نوشته شده توسط: haray    

سن وارایکن،

هامی سن رنگ اولار،سن تک قوخاردی!

ایندیسه توم اینسانلار سنه بنزه ییر،

سن یوخ ایکن!


سه شنبه چهاردهم شهریور 1391

...

   نوشته شده توسط: haray    

دیمه - دوشر بیریسی ایدیم من!

کؤنلومه دیدین،

دوشدوم!...


سه شنبه سی و یکم مرداد 1391

سینیق قولچاق!

   نوشته شده توسط: haray    

 

قولچاغیم قوینومدا،

اومودلاریم خیردا کؤنلومده،

اوشاق ایدیم من!

"یات، بؤیو!" دئیه ردی منیم آنام،

یوخوم قاچمیشدی آنجاق،

یئر تیتره دی، من بؤیودوم!

...

واریم، یوخوم اوشاقلیقدان بیر قولچاغیم، بیر اومودوم!

قیریلمیشدی اونون قولو، ییخیلمیشدی اومودلاریم!

آنام منیم هر نه واریم،

آتام ایدی ییخیلمایان شاهساواریم.

...

یئر تیتره دی...

واریم، یوخوم تالانمیشدی،

آنام یوموب گؤزلرینی،

آتام قیزیم سسله مه دی،

اوزلرینه قارا توپراق قالانمیشدی!

هئی چاغیردیم، منم آنا

سئومه ییرسن داها منی؟!

من دئییلدیم یوخسا سنین

بیرجه قیزین مگر آتا؟!

...

سسلنمه دی هئچ بیریسی،

سیندی منیم اینجه کؤنلوم!

قولچاغیمی تئز گؤتوروب

باسدیم یازیق اوره گیمه

باخدیم یومموش گؤزلرینه!...

گؤرورسن می؟!

ایندی سانکی من بؤیودوم،

اوشاق قالمیش خیال لاریم!

آرتیق سنسن منیم آنام،منیم آتام،

سنسن منیم اومودلاریم!...

 

(قاراداغ بؤلگه سینده اولان زلزله ده

 ایتیردیگیمیز و اوره گی داغلانان وطنداشلاریما ایتحاف!)


صحیفه لرسایی نین توپلامی: 5 1 2 3 4 5