تبلیغات
Haraylarım - و سن آی اوغلان
یکشنبه بیست و هفتم آذر 1390

و سن آی اوغلان

   نوشته شده توسط: haray    

بو شعر سیروس حوسین زاده بی ـین "و سن آی قیز" آدلی شعرینه جاواب اولاراخ یازیلیب.
اؤنجه او شعری "یازینین آردی" ـندان اوخویون سونرا بونو،لوطفن!


و سن آی اوغلان
بئلیندن بومبانی آچدیم
تیک-تاک سسی اینجیتمه سین 
سنی،
بیر ده منی!
گونشدن یورولدوغونو بیلیردیم،
کؤلگه سالدیم اوستونه!
سئودیگین هاوانی دا،
چالدیم، هااا چالدیم.
میزیلداندیم دا هردن
"گئتسینلر خان چوبانا دئسینلر".
هم ده اوینادیم سنه،
اوزومده گولوش،ایچیمده قیرقین!
ساچیمین اوجوندا هؤرمه دیم،
باشین اوسته گول لری سولو درمه دیم...
آنجاق،
نه ایمیشسه بو سئودا،
منی سنه وئردیلر!
گلدیم یانینا،
داها چوخ یاخین،
باغریمدا سازیم،
دیلیمده "خـان چوبان"،
اوزوم ده "سـارای"،
سنه "سـاری گـلین" گلدیم!
حقلی ایمیش سن ایگیدیم،
گونش اینجیدیرمیش،
کئشکه بیری مزاریمیزا کؤلگه سالایدی...!

بئلیمه بومبا باغلامیشام

تیک تیک عومرومون سون سسی گلیر

آزادلیغیمی آزادلیق آدینا دارا چکیبلر

گئدیرم ظولمتین باغرین چارتادام

                               اونو پارتادام

             وسسیمه

بلکه آللاه دیسکینه یوخودان اویانا

بلکه اینسانلیق دیک آتیلا

بلکه ائلیم یاراما ییغیشا 

بلکه گونش هاییما گله

گئدیرم ظولمتین یاخاسین جیرام

اونو کوکوندن ییرقالییام ییخام

باریت قوخوسون تبریزه دولدورام

       وسن آی قیز

قبریمین اوستونه تئز-تئز گلرسن

گیزلین گلرسن کیمسه گورمه سین

آغلامازسان

گؤز یاشین یاراما تؤکولر

بیر اود پارچاسی تک باغریما یاییلار

                               اودلانار

گول دریب گتیمه

اتگین دولوسو گولوش گتیر آهیما

قوی کؤلگن دوشسون قبریم اوستونه

گونش گؤزومو قاماشدیریر اینجیدیر

           وقارا گئیمه

قیرمیزی دونونو اینینده گؤروم

گنجه یایلیغینی باشیندا گؤروم

         و سن آی قیز

گلنده سازین قوینوندا گلسین

گل اوخو قبریمه "آپاردی سئللر سارانی"

گل اوینا قبریمین اوستونده "ساری گلین"

منیم اوره گیم بولوک-بولوک تیکه-تیکه

بلکه گؤروب سنی ییغیشا بیر یئره

نئچه موددتدی

اوزوم اوزونه تامارزیدی آی گولوم

آغلار گؤزلریم گؤزلرینه تامسینیر

      وبیر سؤز آتیلادان اوخو، آما آغلاما

آند ایچیرم منده آغلامییاجام

خزریم جانی آغلامییاجام

"وکؤنلومده

 سولموش ائلیمین  آغ جومهورییتی قانا باتیب

کوچه لره قان سپمیشم

یار گلنده توز اولماسین"

و سن آی قیز

باخیشیم آسیلیب تروریست  گؤزلریندن

و سن آی قیز

سنله یم آی قیز

من غریبم

قبریمین اوستونه تئز-تئز گلرسن

قبریمین اوستونه تئز-تئز گلرسن

 

               

                               (حوسین زاده سیروس)