تبلیغات
Haraylarım - ناموسسوز آخشام چاغی!...
پنجشنبه بیست و دوم تیر 1391

ناموسسوز آخشام چاغی!...

   نوشته شده توسط: haray    

 

اوزونه بئله باخماقا قییامادیم سنین،

سن گئدرکن او آخشام چاغی...

خاطیرلاییرسان می او قارانلیغی؟!

ایچیمیز اوشویوردو،

باشیمیز چاتلاییردی او سس سیزلیکدن!...

سن منه باخیردین،

من سنه باخیردیم...

من یئره باخارکن،

سن منه باخیردین...

نه دئییردی او باخیشین سنین؟!

هانسی سؤز قالمیشدی اورگینده، دئ!

...

ایکیمیز قالمیشدیق او سویوق یئرده،

ایکیمیز بیلیردیک نه دیر دردیمیز!

نه سن آنلاتدین،

نه من آنلاتدیم...

ایکیمیزده سئزمیشدیک آیریلیق حؤکمون،

نه سن دانیشدین،

نه من دانیشدیم...

سون باخیش دیله گی تیتره درکن ایچیمی ،

سنه باخمادیم...

گؤزوم، گؤزونه حسرتکن

قاپییا باخدیم...

دیلیم سؤزجوکدن دولوب، داشارکن،

ایچیمه تؤکدوم، دیشیمی سیخدیم...

قاپی آچیلدی، سن گئدر اولدون...

گئتمه دئمه دیم،

دییه بیلمه دیم...

آرخانجا او قاپی، قاپی باغلاندی!

الیم باغلاندی، دیلیم باغلاندی...

اورگیم داشدی،

گؤز یاشیملا سولادیم سن گئدن یولو...

اونوتمادیم بیر آن سنین آدینی، سنین یادینی،

او ناموسسوز آخشام چاغینی...!

ایچیمده قالمیشدین سن،

اؤزون بیلمه دن،

دوستلار بیلمه دن،

آدینی هایقیراماغا دیلیم یوخودو...

ایچیمده قالمیشدین سن،

او ناموسسوز آخشامدان بری...!